Registers van de Hollandse grafelijkheid 1299-1345

Broeder Hendrik, abt van Ter Doest, geeft vidimus van een oorkonde d.d. 1311 september 29 waarin Nicolaas heer van Putten en Strijen en Aleid vrouwe van Putten en Strijen bepalen dat hun dochter Aleid na hun dood een jaargeld van in totaal 500 pond Hollands zal ontvangen uit verschillende goederen, welke rente zij in erfleen zal houden van hun oudste dochter Beatrijs, die deze rente onder bepaalde voorwaarden mag lossen voor een bedrag ineens; graaf Willem III belooft Aleids rechten te zullen beschermen en zegelt de oorkonde mede.

Wi broeder^a Henric^b gheseyt abt van der Does doen te wetene allen den ghenen die ^c dese letteren zullen zien of horen lezen dat wi hebben ghesien ende ghelesen ene chartre wel ghezeghelt, ghans onghecancilliert ende sonder rasure, in die woerde die hier na volghen zullen.

Wi Niclays^d here van Putthe^e ende van Striene ende wi Alijd vrouwe van Putthe ende van Striene maken cond^f allen den ghenen die desen brief^g zullen zien of horen lesen dat wi bi over een draghene van ons beyden ende bi rade van goiden luden omme die nutscepe, die ruste ende dien pays van onsen kendren^h die wi nu hebben, ende om dat wi willen dat hem elc ghepait houd ende ghenen kijf onderlinghe en hebben na onser beyder doit, soe hebben wise gheghoet ⁱ ende elc bewijst op zijn goed binnen onsen levene in deser manieren dat hier na ghescreven staet. In den eirsten soe bewisen wi Niclays here van Putthe ende van Striene voirseyt na onse doet Aleyden onser dochter die wi nu hebben alle die tiende in Catendrecht^j die wi coften jeghen heren Jacop van Mirlare voir hondert pond Hollands^k; voird soe bewisen wi hare na onser doet die bede van den Oistambocht^l ende van den Westambocht^m van Catendrechtⁿ voir vijftich pond Hollands; voirt soe bewisen wi hare na onser doet alle die tiende die wi hebben binnen der vorsche^o van Portghale^p; voirt hondert pond Hollands die wilke wi houden van den heren van sinte Martijns^q tUtrecht^r; voirt soe bewisen wi hare hondert pond Hollands na onse doet sjaers, in te nemene van onser ghershure in sinte Jans daghe middezomer^s van den eirsten ghelde dat mer of ontfaet, uyt ghenomen der heren gheld van onser Vrouwen kerke te Ghervliet^t; ende wi Alijd vrouwe van Putthe ende van Striene voirnoemt bewisen na onse doet Aleyden^u onser dochter^v voirs. hondert ende vijfticht pond Hollands uyt onser ghershure jaerlix, in te nemene in sinte Pieters daghe in ghaende oeist^w van den eirsten ghelde dat mer of ontfaet. Ende dit es in ^x summe vijf hondert pond Hollands sjaers, die wilke vijf hondert pond Hollands voirs. Aleyd^y onse dochter voirnoemt houden zal bi willen van onsen beyden vader ende moder voirnoemt van Beatricen onser oudster dochter die wi nu hebben te rechten erfliene, soe dat niet an hare besterven en zal moghen het en ware dat hair van rechter ^z maechscepe ane besturve. Ende waer dat sake dat Beatrice onse oudste dochter voirs. beghaerde dese voirseyde vijf hondert pond ^a' sjaers of te lossene, soe willen wi^b' Niclays ende Aleyd^c' vornoemt dat soese^d' of lossen mach elc hondert pond om dusent pond, te gheven op enen dach toit ter tijd dat sise die vijf hondert pond ghehelike ende al gheloest heeft; ende hier bi so^e' zal Aleyd^f' onse dochter voirs. vertien van alre antale ende besterfte die hair an besterven mochte van enighen van ons beyden vader ende moeder voirnoemt.

Ende om dat wi Niclays^g' here van Putthe ende van Striene ende wi Aleyd vrouwe van Putthe ende van Striene voirnoemt willen dat alle dese voirscreven dinghen ewelike vast ende wel ghehouden bliven, soe hebben wi ghebeden ende bidden onsen welieven^h' ende gherechten here Willem^i' grave van Henegouwen^j', van Holland^k', van Zeeland ende here van Vrieseland^l', waer dat jement an dit voirghenomede goid an spreken woude joft Aleyd^m' onser ^n' dochter voirnoemt enich onrecht daer of doen, dat hi haer ende hair goid voirghenoemt bescermede ende te staden stonde jeghens elken mensche^o', ende zinen zeghel hanghe wille in kennesse van al deser ding an desen jeghenwoerdighen brief. Ende wi Willem^p' grave van Henegouwen^q' etc. voirnoemt om bede wille ons liefs neven Niclays here van Putthe ende van Striene ende onser liever nichten Aleyden vrouwe van Putthe ende van Striene voirghenoemt, soe hebben wi beloeft ende beloven Aleyden onser liever nichten ende hare goed voirnoemt te bescermen ende in staden te stane jeghens elken mensche, ende hebben in kennessen ende in sekerheden^r' van allen desen dinghen desen brief voir bezeghelt met onsen seghele. Ende wi Niclays here van Putthe ende van Striene ende wi Aleyd^s' vrouwe van Putthe ende van Striene voirnoemt al diere ghelike in kennesse van al deser ding metten^t' onsen. Dit was ghedaen int jaer ons Heren als men screef dusent drie hondert ende ellevene op sinte Michiels dach.

Ende wi broeder Henric^u' abt van der Does voirs. in kenlicheden der waerheden hebben desen brief uythanghede^v' bezeghelt met onsen zeghel int jaer ons Heren M^o CCC vijf ende twintich op den heylighen dach van den Sacramente.